(٣١٧٣٠) ابراہیم فرماتے ہیں کہ دو حقیقی بہنوں کے لیے دو تہائی حصّہ ہے اور علّاتی بھائیوں اور بہنوں کے لیے باقی مال ہے اس طرح کہ ایک مرد کے لیے دو عورتوں کے حصّے کے برابر مال ہوگا، یہ حضرت علی (رض) اور زید بن ثابت (رض) کی رائے ہے، اور حضرت عبداللہ (رض) کے فرمان کے مطابق مرنے والے کی دو حقیقی بہنوں کے لیے دو تہائی اور باقی میت کے بہن بھائیوں میں سے صرف مردوں کے لیے ہے نہ کہ عورتوں کے لئے۔
حضرت ابوبکر فرماتے ہیں کہ یہ مسئلہ دونوں آراء کے مطابق تین کے عدد سے حل ہوگا، بہنوں اور بیٹیوں کے لیے دو تہائی مال ہے اور جو ایک تہائی باقی بچے گا وہ بھائیوں اور بہنوں کے درمیان تقسیم ہوگا یا میت کی پوتیوں اور بیٹے کے درمیان تقسیم ہوگا کہ ایک مرد کا حصّہ دو عورتوں کے حصّے کے برابر ہوگا۔