(٣١٨٩٥) حضرت ابراہیم اس عورت کے بارے میں جو اپنی حقیقی بہن، اور دادا اور ماں کو چھوڑ جائے کہ حضرت علی (رض) کے فرمان کے مطابق اس کی حقیقی بہن کے لیے آدھا مال اور اس کی ماں کے لیے ایک تہائی مال اور اس کے دادا کے لیے مال کا چھٹا حصّہ ہے۔
اور حضرت عبداللہ فرماتے تھے کہ ماں کے لیے چھٹا حصّہ ، دادا کے لیے ایک تہائی مال اور بہن کے لیے آدھا مال ہوگا، اور حضرت عبداللہ (رض) یہ بھی فرمایا کرتے تھے کہ اللہ تعالیٰ مجھے اس حال میں نہیں دیکھیں گے کہ میں ماں کو اس مسئلے میں یا اس کے علاوہ کسی مسئلے میں دادا پر ترجیح دوں۔
اور حضرت زید (رض) ماں کو ایک تہائی مال دیتے تھے اور بہن کو بقیہ مال کا ایک تہائی دیتے تھے، اس مسئلے میں حضرت زید (رض) مال کو نو حصّوں پر تقسیم کرتے تھے، ماں کے لیے ایک تہائی مال یعنی تین حصّے، بہن کے لیے بقیہ مال کا ایک تہائی یعنی دو حصے ، اور دادا کے لیے چار حصّے۔
اور حضرت عثمان (رض) مال کو ورثاء کے درمیان تین حصّوں میں تقسیم کرتے، ماں کے لیے ایک تہائی مال ، بہن کے لیے ایک تہائی اور دادا کے لیے بھی ایک تہائی۔
اور حضرت ابن عباس (رض) فرماتے تھے کہ دادا باپ کے درجے میں ہے۔