(٣٢٧٦٦) حضرت شداد ابو عمارہ (رض) فرماتے ہیں کہ میں حضرت واثلہ (رض) کی خدمت میں حاضر ہوا اس حال میں کہ ان کے پاس چند لوگ بیٹھے ہوئے تھے ۔ پس ان لوگوں نے حضرت علی (رض) کا ذکر کیا پھر ان کو سب و شتم کرنے لگے تو میں نے بھی ان کے ساتھ ان کو برا بھلا کہا۔ تو حضرت واثلہ (رض) نے فرمایا : کیا میں تمہیں اس حدیث کے بارے میں نہ بتلاؤں جو میں نے خود رسول اللہ (صلی اللہ علیہ وآلہ وسلم) سے سنی ؟ میں نے کہا : کیوں نہیں ضرور سنائیں۔ آپ (رض) نے فرمایا : میں حضرت فاطمہ (رض) کے پاس گیا میں نے ان سے حضرت علی (رض) کے متعلق پوچھا : تو وہ فرمانے لگیں ! آپ (صلی اللہ علیہ وآلہ وسلم) رسول اللہ (صلی اللہ علیہ وآلہ وسلم) کے پاس گئے ہیں پس میں بیٹھ کر انتظار کرنے لگا کہ رسول اللہ (صلی اللہ علیہ وآلہ وسلم) تشریف لائیں درآنحالیکہ حضرت علی (رض) ، حضرت حسن (رض) اور حضرت حسین (رض) بھی آپ (صلی اللہ علیہ وآلہ وسلم) کے ساتھ تھے۔ ان سب نے ایک دوسرے کا ہاتھ پکڑا ہوا تھا یہاں تک کہ وہ گھر میں داخل ہوگئے۔ پھر آپ (صلی اللہ علیہ وآلہ وسلم) نے حضرت علی (رض) اور حضرت فاطمہ (رض) کو اپنے قریب کیا اور ان دونوں کو اپنے سامنے بٹھا لیا ۔ اور حضرت حسن (رض) اور حضرت حسین (رض) کو بھی بٹھایا یہ دونوں آپ (صلی اللہ علیہ وآلہ وسلم) کی ران پر تھے۔ پھر آپ (صلی اللہ علیہ وآلہ وسلم) نے ان سب پر اپنا کپڑا یا چادر ڈال دی ۔ پھر یہ آیت تلاوت فرمائی۔ اے نبی (صلی اللہ علیہ وآلہ وسلم) کے گھر والو ! اللہ تو بس یہ چاہتا ہے کہ تم سے گندگی کو دور کر دے۔
پھر آپ (صلی اللہ علیہ وآلہ وسلم) نے فرمایا : اے اللہ ! یہ لوگ میرے گھر والے ہیں۔ اور میرے گھر والے سب سے زیادہ حقدار ہیں۔