4495: ۔۔ حضرت علی (رض) فرماتے ہیں : یاجوج ماجوج دیوار کے پیچھے ہیں۔ ان میں سے کوئی نہیں مرتا جب تک کہ اس کی اولاد میں سے ہزار افراد پیدا ہوجائیں۔ و ہر روز صبح کو دیوار پر آتے ہیں اور اس کو چاٹتے ہیں حتی کہ اس کو انڈے کے چھلکے کی مانند کرکے چھوڑ دیتے ہیں اور کہتے یں۔ چلو کل اس کو کھول لیں گے ۔ چنانچہ جب وہ اگلے روز صبح کو آتے ہیں تو چاٹنے سے پہلے دیوار جس حالت پر تھی اس پر پاتے ہیں۔
پس یہ لوگ اسی طرح مشقت میں مبتلا رہیں گے حتی کہ ان میں ایک مسلمان پیدا ہوگا۔ پھر جب وہ صبح کو جائیں گے تو یہ مسلمان ان کو کہے گا : بسم اللہ کہو۔ پس وہ بسم اللہ کہہ کر کام شروع کردیں گے۔ شام کو وہ لوٹنا چاہیں گے اور کہیں گے کل اس کو کھول دیں گے۔ مسلمان ان کو کہے گا ان شاء اللہ کہو۔ چنانچہ وہ ان شاء اللہ کہیں گے۔ پھر وہ صبح کو آئیں گے تو دیوار کو گزشتہ شام کی حالت پر چھلکے کی طرح ہی پائیں گے ۔ لہٰذا وہ اس میں بآسانی سوراخ کرلیں گے۔ اور وہاں سے نکل نکل کر انسانوں پر امڈ آئیں گے سب سے پہلے جو نکلیں گے وہ ستر ہزار تعداد میں ہوں گے جن کے سروں پر تاج ہوں گے۔ اس کے وہ فوج در فوج نکلتے ہی جائیں گے۔ پھر وہ تمہاری اس نہر فرات کی طرح کسی نہر پر آئیں گے تو اس کا سارا پانی پی جائیں گے ان کے پیچھے والی فوج آئے گی تو نہر کو خشک دیکھ کر کہے گی : یہاں کبھی پانی ہوتا ہوگا۔ یہی اللہ تعالیٰ کا فرمان ہے :
فاذا جاء وعد ربی جعلہ دکاء و کان وعد ربی حقا۔ الکہف : 98 ۔
جب میرے پروردگار کا وعدہ آجائے گا تو اس کو (ڈا کر) ہموار کردے گا اور میرے پروردگار کا وعدہ سچا ہے۔
حضرت علی (رض) نے فرمایا : الدکاء ریت ہے۔ (یعنی اس دیوار کو ریت کا گھروندہ بنا دے گا۔ ابن ابی حاتم۔