٨٣١٢۔۔۔ اے امت محمد ! (صلی اللہ علیہ وآلہ وسلم) سنبھل کر، تم سے پہلے جو لوگ ہلاک ہوئے اسی وجہ سے ہلاک ہوئے، جھگڑے کو ترک کردو کیونکہ اس میں بھلائی بہت کم ہے، لڑائی ترک کردو کیونکہ ایماندار لڑتا نہیں، لڑائی چھوڑدو کیونکہ جھگڑالو شخص کے خسارے کا سامان پورا ہوچکا، لڑائی چھوڑ دو ، تمہارے لیے اتنا گناہ کافی ہے کہ تم ہمیشہ جھگڑے کرتے رہو لڑائی چھوڑدو کیونکہ میں قیامت کے روز جھگڑالو کے لیے سفارش نہیں کروں گا۔ لڑائی چھوڑدو کیونکہ میں اس شخص کے لیے جو باوجود سچے ہونے کے لڑائی چھوڑدے، جنت کے نچلے ، درمیانے اور اوپر والے حصہ میں تین گھروں کا ذمہ دار ہوں ، لڑائی جھگڑا ترک کردو کیونکہ میرے رب نے بت پرستی کے بعد جس چیز سے سب سے پہلے روکاوہ جھگڑا ہے۔
کیونکہ بنی اسرائیل اکہتر (٧١) فرقوں میں بٹ گئے، اور نصاریٰ تہتر (٧٣) فرقوں میں سب کے سب گمراہ ہوئے صرف سواداعظم ہدایت پر ہے۔ آپ نے فرمایا : جس طریقہ پر میں اور میرے صحابہ ہیں اللہ تعالیٰ کے دین میں جھگڑانہ کرے۔
اور جو کسی توحید والے کی کسی گناہ کی وجہ سے تکفیر نہ کرے تو اس کی بخشش کردی جائے گی، اسلام کی ابتداء اجنبیت میں ہوئی اور عنقریب وہ پھر اجنبی ہوجائے گا، تو خوشخبری ہے اجنبیوں کے لیے، لوگوں نے عرض کیا : یارسول اللہ غرباء کون لوگ ہیں ؟ آپ نے فرمایا : جو لوگوں کی اصلاح کرتے ہیں اور توحید والوں میں سے کسی کی کسی گناہ کی وجہ سے تکفیر نہیں کرتے۔
(طبرانی فی الکبیر عن ابی الدرداء وابی امامۃ واثلہ بن الاسقع وانس)
تشریح :۔۔ یعنی دین میں بگاڑ کی اصلاح کرنے والے ایسے اوپرے اور اجنبی لگیں کہ لوگ ان کی بات کو عجوبہ اور اچھنبا سمجھیں گے