حضرت نعمان بن بشیر رضی اللہ عنہ سے روایت ہے کہ رسول اللہ ﷺ نے فرمایا : سب مسلمان ایک شخص واحد (کے مختلف اعضاء) کی طرح ہیں ۔ اگر اس کی آنکھ دکھے تو اس کا سارا جسم درد محسوس کرتا ہے ، اور اسی طرح اگر اس کے سر میں تکلیف ہو تو بھی سارا جسم تکلیف میں شریک ہوتا ہے ۔ (صحیح مسلم)

تشریح
مطلب یہ ہے کہ پوری امت مسلمہ گویا ایک جسم و جان والا وجود ہے ، اور اس کے افراد اس کے اعضاء ہیں ۔ کسی کے ایک عضو میں اگر تکلیف ہو تو اس کے سارے اعضاء تکلیف محسوس کرتے ہیں ۔ اسی طرح پوری ملت اسلامیہ کو ہر مسلمان فرد کی تکلیف محسوس کرنی چاہئے ۔ اور ایک کے دکھ درد میں سب کو شریک ہونا چاہئے ۔