٢١٨ : محمد بن یحییٰ کہتے ہیں میں نے عبداللہ بن عبداللہ بن عمر (رض) سے پوچھا کیا تم نے اپنے والد کو ہر نماز کے لیے وضو کرتے دیکھا ہے خواہ وہ وضو سے ہوتے یا حدث کی حالت میں ہوتے ؟ وہ ایسا کس وجہ سے کرتے تھے ؟ (اس پر) عبداللہ کہنے لگے مجھے اسماء بنت زید (رض) بن خطاب نے بیان کیا کہ ان کو عبداللہ بن حنظلہ بن ابی عامر نے بیان کیا کہ جناب نبی اکرم (صلی اللہ علیہ وآلہ وسلم) کو ہر نماز کے لیے تازہ وضو کرنے کا حکم ہوا خواہ پہلے وضو ہو یا نہ ہو جب یہ بات آپ پر گراں ہوگئی تو پھر ہر نماز کے لیے مسواک کا حکم دیا (گویا وضو کا حکم ہر نماز کے لیے منسوخ کردیا گیا) جو کچھ ہم نے ذکر کیا اس سے یہ ثابت ہوا کہ جب تک وضو نہ ٹوٹے اس وقت تک پہلا وضو کافی ہے۔ اگر کوئی یہ اعتراض کرے کہ اس روایت میں تو ہر نماز کے لیے مسواک کا وجوب ثابت ہوتا ہے اور تم اس کو واجب نہیں سمجھتے تاکہ مکمل حدیث پر عمل ہو اور جبکہ تم اس کے بعض حصہ پر عمل کرتے ہو۔ اس کو یہ جواب دیا جائے گا کہ یہ بالکل ممکن ہے کہ مسواک کا ہر نماز کے لیے واجب ہونا آپ (صلی اللہ علیہ وآلہ وسلم) کے لیے خاص ہو نہ کہ امت کے لیے اور یہ بھی درست ہے کہ آپ (صلی اللہ علیہ وآلہ وسلم) اور صحابہ کرام (رض) اس سلسلہ میں برابر ہوں۔ اس بات کی حقیقت کی طرف پہنچنا اسی وقت ممکن ہے جب اس سلسلے میں پوری واقفیت حاصل کریں۔ پس ہم نے سوچا کہ کیا کوئی روایت ہمیں ایسی مل جاتی ہے جو اس سلسلے میں ہماری راہنمائی کرے۔
تخریج : ابو داؤد فی الطھارۃ باب ٢٥‘ روایت ٤٨‘
امام طحاوی (رح) کا اشارہ :
ابن عمر (رض) خیال کرتے تھے کہ ان کو اس بات کی ہمت ہے پس وہ ہر نماز کے لیے وضو کرتے اور ترک نہ فرماتے اس روایت سے معلوم ہوتا ہے کہ آپ (صلی اللہ علیہ وآلہ وسلم) کو ہر نماز کے لیے وضو کا حکم تھا پھر بعد میں یہ منسوخ ہوگیا اور یہ بات بھی ثابت ہوئی کہ جب تک حدث پیش نہ آئے سابقہ وضو کفایت کر جائے گا۔
ایک اعتراض :
تم حدیث پر مکمل عمل کے دعویدار ہو حالانکہ حدیث بالا سے تو ہر نماز کے لیے مسواک کا وجوب ثابت ہو رہا ہے تم اس کی سنیت کے قائل ہو تو حدیث کے ایک حصہ پر عمل کرتے اور دوسرے کو چھوڑتے ہو۔
جواب : ہر نماز کے لیے مسواک کا وجوب آپ کی ذات گرامی کے ساتھ خاص تھا جیسا کہ وضو کا عمل بھی آپ کے ساتھ خاص تھا امت کے لیے ایسا حکم نہ تھا ورنہ صحابہ کرام بھی ضرور ایسا کرتے اس میں روایات کی طرف رجوع کرنا ہوگا کیونکہ اس کا دارومدار ثبوت پر ہے جو ثابت ہوجائے وہ سر آنکھوں پر چنانچہ روایات ملاحظہ ہوں۔