٣٨٢: ام عامر بنت یزید (رض) ان عورتوں میں سے ہیں جنہوں نے جناب رسول اللہ (صلی اللہ علیہ وآلہ وسلم) کی بیعت کی وہ کہتی ہیں کہ میں نے جناب رسول اللہ (صلی اللہ علیہ وآلہ وسلم) کی خدمت میں ہڈی والی بوٹی پیش کی جبکہ آپ مسجد بنی عبدالاشہل میں تھے آپ (صلی اللہ علیہ وآلہ وسلم) نے اس سے دانتوں کے ذریعہ گوشت کاٹا پھر آپ نماز پڑھانے کھڑے ہوگئے اور آپ نے وضو نہ فرمایا۔ ان آثار میں یہ بات ثابت ہوتی ہے جس سے آگ سے پکی ہوئی چیز کے ناقض وضو ہونے کی نفی ہوتی ہے کیونکہ جناب رسول اللہ (صلی اللہ علیہ وآلہ وسلم) نے اس سے وضو نہیں فرمایا اور عین ممکن ہے کہ پہلے آثار میں جس وضو کا حکم ہو وہ نماز و الا حکم ہو اور یہ بھی ممکن ہے اس کہ اس سے ہاتھوں کا دھونا مراد ہے ‘ نماز والا وضو نہ ہو مگر یہ کہ آپ سے یہ ثابت ہوجائے کہ آپ نے وضو کیا اور وضو نہیں بھی کیا۔ پس ہم یہ چاہتے ہیں کہ ہم آپ کے آخری عمل کو معلوم کرلیں۔
تخریج : معجم الکبیر للطبرانی ٢٥؍١٤٨؍١٤٩‘ مسند احمد ٦؍٣٧٢
اللغات : عرق : گوشت والی ہڈی ‘ عرق : دانتوں سے گوشت ہڈی سے اتارنا۔
حاصل روایات : ان چھبیس روایات سے یہ بات ثابت ہوتی ہے کہ آپ نے آگ سے پکی ہوئی چیز استعمال کرنے کے بعد نیا وضو نہیں کیا بلکہ سابقہ وضو سے نماز ادا فرمائی۔
ان میں عبداللہ بن عباس (رض) کی روایت تو سات اسناد اور جابر بن عبداللہ (رض) کی روایت تین اسناد اور اسی طرح امّ سلمہ کی روایت تین اسناد اور ابو رافع کی روایت دو اسناد اسی طرح سوید بن نعمان دو اسناد اور کسی ام المؤمنین کی روایت دو سندوں اور ام حکیم ‘ ابو سعید خدری ‘ عبداللہ بن حارث ‘ عمرو بن امیہ ‘ عمرو بن عبیداللہ کی روایات ایک ایک سند سے ذکر کی ہیں۔
دلیل کا نیا رخ اور فریق اول کی دلیل کی کمزوری :
پیش کردہ روایات محتمل ہیں نمبر ١: وضو سے مراد نماز والا وضو نمبر ٢: وضو سے فقط ہاتھ منہ دھونا مراد ہو۔ نماز والا وضو مراد نہ ہو اور فریق دوم کی روایات وضو نہ کرنے میں واضح ہیں مگر اس بات کی مزید تحقیق کے لیے کہ دونوں میں آخری عمل کون سا ہے جو آپ (صلی اللہ علیہ وآلہ وسلم) سے اخیر میں ثابت ہے اس کے لیے مندرجہ ذیل روایات کو ملاحظہ کریں جن کو ابو زرعہ۔ ابو امیہ اور ابن ابی داؤد نے بیان کیا ہے۔