٣٨٤٧: ہشام بن عروہ نے عائشہ صدیقہ (رض) سے بیان کیا کہ ہم چاند کی تاریخ کے مطابق نکلے جناب رسول اللہ (صلی اللہ علیہ وآلہ وسلم) نے اعلان فرمایا جو چاہے حج کا احرام باندھے اور جو چاہے عمرہ کا احرام باندھے باقی میں تو حج کا احرام باندھوں گا اس لیے کہ میرے ساتھ ہدی ہے عائشہ (رض) فرماتی ہیں ہم میں سے بعض لوگوں نے حج کا احرام باندھا اور بعض نے عمرے کا اور میں نے عمرے کا احرام باندھا۔ مگر عرفہ کے دنوں میں مجھے حیض آنے لگا۔ تو جناب رسول اللہ (صلی اللہ علیہ وآلہ وسلم) نے فرمایا تم اپنے عمرہ کو ترک کر دو اور اپنے بالوں کو کھول ڈالو۔ اور کنگھی کرلو پھر حج کا تلبیہ کہو پس میں نے حج کا تلبیہ کہا۔ جب منی سے واپسی کی رات آئی اور میں حیض سے پاک ہوگئی تو جناب رسول اللہ (صلی اللہ علیہ وآلہ وسلم) نے عبدالرحمن بن ابی بکر (رض) کو حکم دیا وہ مجھے تنعیم لائے پس میں نے عمرہ کا تلبیہ اپنے عمرے کی قضا کے لیے کہا۔ پس حضرت عائشہ صدیقہ (رض) نے بیان کردیا کہ میرا حج عمرہ سے الگ تھا اور ان دونوں کے مابین انھوں نے اپنے بالوں کو کنگھی کی اور کھولا۔ تو اب آپ ہی فرمائیں کہ یہ کس طرح جائز ہے کہ حضرت صدیقہ (رض) کا طواف ان کے حج کے لیے تھا وہ حج جو کہ اس حج اور ان کے عمرے کے مابین تھا کہ وہ طواف ان کے حج وعمرہ دونوں کے لیے کافی ہو یہ بالکل ناممکن ہے اور یہ روایت ابو الزبیر کی روایت سے اولیٰ ہے جو انھوں نے حضرت جابر (رض) سے روایت کی ہے۔ کیونکہ اس میں حضرت جابر (رض) نے صرف حضرت عائشہ صدیقہ (رض) کا واقعہ ذکر کیا ہے اور عمرہ اور حج کے مابین احرام کھولنے کا تذکرہ نہیں ہے۔ جب کہ اس روایت میں حضرت صدیقہ (رض) کا بیان ہے کہ مجھے جناب رسول اللہ (صلی اللہ علیہ وآلہ وسلم) حج شروع کرنے سے قبل ترک عمرہ اور احرام سے خارج لوگوں والے افعال کا حکم فرمایا اور میں نے اسی طرح کیا جیسا کہ روایت میں مذکور ہے اور اس سے یہ دلالت میسر آگئی کہ حضرت عائشہ صدیقہ (رض) سے عطا والی روایت تو حجاج وعبد الملک والی روایت کی طرح ہے ابن ابی نجیح کی طرح نہیں۔ جو لوگ قارن کے لیے حج وعمرہ کا ایک ہی طواف مانتے ہیں ان کی مستدل روایت ذیل میں ہے۔
تخریج : مسلم فی الحج ١١٥‘ ابو داؤد فی المناسک باب ٢٣‘ نسائی فی المناسک باب ٤٨‘ مسند احمد ٦؍١٩١۔
حاصل روایت : اس روایت میں جناب عائشہ (رض) نے واضح کیا ہے کہ میں نے عمرے سے علیحدگی اختیار کرلی تھی اور حج اور سابقہ احرام عمرہ کے درمیان بالوں کو کھول کر کنگھی بھی کی تھی۔
پھر کیسے کہا جاسکتا ہے کہ ان کا یہ طواف حج کے لیے تھا جس کے اور عمرے کے درمیان بالکل بال کھول کر کنگھی کرنے کا بھی معاملہ ہوا ہے کیا یہ طواف ان کے حج وعمرہ دونوں کے لیے کفایت کرسکتا ہے ؟ یہ ناممکن بات ہے یہ ابوالزبیر عن جابر (رض) کی روایت سے اولیٰ ہے اس لیے کہ اس میں جابر (رض) کہتے ہیں کہ وہ اپنے عمرہ اور حج کے درمیان حلال نہیں ہوئیں اور عائشہ (رض) نے اس روایت میں اطلاع دی ہے کہ جناب نبی اکرم (صلی اللہ علیہ وآلہ وسلم) نے خود اس کو حج میں داخلے سے پہلے اپنے سابقہ عمرہ کو چھوڑنے کا حکم فرمایا تھا اور ان افعال کا حکم فرمایا جو حلال کرتا ہے اس سے یہ بات پایہ ثبوت کو پہنچی کہ روایت عائشہ (رض) وہ درست ہے جس کو حجاج و عبدالملک نے عطاء عن عائشہ (رض) بیان کیا ہے نہ کہ وہ جس کو ابو نجیح نے بیان کیا اب حاصل یہ ہوا کہ حضرت عائشہ (رض) کا طواف حج فسخ شدہ عمرہ کی طرف سے کفایت کرنے والا نہیں کیونکہ عمرہ حج سے بالکل الگ ہے پس اس روایت سے استدلال درست نہیں۔
فریق اوّل کی دلیل خامس : اس روایت سے بھی ثابت ہوتا ہے کہ حج قران کرنے والے کو ایک طواف و سعی کافی ہے۔