٤٤٣٥: شعبی نے فاطمہ بنت قیس (رض) سے روایت کی ہے کہ اس کے خاوند نے اس کو تین طلاق دے دیں وہ جناب نبی اکرم (صلی اللہ علیہ وآلہ وسلم) کی خدمت میں حاضر ہوئی تو آپ نے فرمایا تمہیں خرچہ و رہائش نہ ملے گی۔ شعبی کہتے ہیں میں نے یہ بات ابراہیم نخعی کو بتلائی تو وہ فرمانے لگے کہ عمر بن خطاب (رض) کو اس کی اطلاع دی گئی تو انھوں نے فرمایا ہم اللہ تعالیٰ کی کتاب اور قول رسول اللہ (صلی اللہ علیہ وآلہ وسلم) کو ایک عورت کی بات پر چھوڑنے والے نہیں شاید اس کو وہم ہوگیا ہو ‘ میں نے تو جناب رسول اللہ (صلی اللہ علیہ وآلہ وسلم) کو فرماتے سنا اس کو رہائش و نفقہ دونوں ملیں گے۔