٤٧٣١: عبیداللہ بن عبداللہ نے حضرت ابوہریرہ (رض) اور زید بن خالد جہنی (رض) اور شبل (رض) سے نقل کیا کہ ہم جناب نبی اکرم (صلی اللہ علیہ وآلہ وسلم) کی خدمت میں حاضر تھے۔ ایک آدمی کھڑا ہوا اور کہنے لگا میں آپ کو قسم دیتا ہوں ! کہ آپ ہمارے درمیان اللہ تعالیٰ کی کتاب کے مطابق فیصلہ فرما دیں۔ اس کے مخالف نے کہا وہ اس سے زیادہ سمجھدار تھا۔ اس نے سچ کہا ہے ہمارے مابین کتاب اللہ کے مطابق فیصلہ فرمائیں اور مجھے کہنے کی اجازت دیں آپ (صلی اللہ علیہ وآلہ وسلم) نے فرمایا۔ کہو ! اس نے کہا میرا بیٹا اس کے ہاں مزدور تھا اس نے اس کی بیوی سے زنا کیا ہے۔ میں نے ایک سو بکریاں اور غلام اس کے فدیہ میں دیا ہے۔ پھر میں نے اہل علم سے دریافت کیا تو انھوں نے بتلایا کہ میرے بیٹے پر سو کوڑے اور ایک سال کی جلا وطنی ہے اور اس کی بیوی پر سنگساری ہے۔ آپ نے فرمایا مجھے اس ذات کی قسم ہے جس کے قبضہ قدرت میں میری جان ہے۔ میں تمہارے درمیان ضرور کتاب اللہ کے مطابق فیصلہ کروں گا سو بکریاں اور خادم تجھ پر واپس لوٹائے جائیں گے اور تیرے بیٹے پر سو کوڑے اور ایک سال جلا وطنی کی سزا ہوگی اور اے انیس تم صبح عورت کے ہاں جاؤ۔ پھر اگر وہ اعتراف کرے تو اس کو سنگ سار کر دو ۔ انیس (رض) صبح اس کے ہاں گئے تو اس نے اعتراف کرلیا پھر انھوں نے اس کو سنگسار کردیا۔
تخریج : والایمان باب ٣‘ الحدود ٣٠؍٣٤‘ ٣٨؍٤٦‘ مسلم فی الحدود ٢٥‘ ابو داؤد فی الحدود باب ٢٥‘ ترمذی فی الحدود باب ٨‘ نسائی فی القضاء باب ٢٢‘ ابن ماجہ فی الحدود باب ٧‘ دارمی فی الحدود باب ١٢‘ مالک فی الحدود ٦‘ مسند احمد ٣؍١١٥‘ ١١٦۔
لغات : العسیف۔ مزدور۔ جلد۔ کوڑے لگانا۔