٥٢٤٨: عکرمہ نے ابن عباس (رض) سے روایت کی ہے کہ جب بدر کا دن آیا تو جناب رسول اللہ (صلی اللہ علیہ وآلہ وسلم) نے ارشاد فرمایا۔ جس نے فلاں کام اس طرح انجام دیا اس کو اتنا ملے گا جس نے اس طرح کیا اس کو یہ دیا جائے گا۔ جوان آگے بڑھ گئے اور بوڑھے جھنڈوں کے نیچے رہے۔ جب غنیمت جمع ہوگئی تو نوجوانوں نے اپنی خصوصی غنیمت کا مطالبہ کیا۔ بوڑھے بولے تم ہمارے مقابلے میں قابل ترجیح نہیں ہو۔ ہم تو جھنڈوں کی حفاظت میں ان کے نیچے رہے۔ اگر تم شکست کھا کر پیچھے ہٹتے تو ہم تمہارے لیے دفاعی معاون تھے۔ اس پر اللہ تعالیٰ نے یہ آیت اتاری یسئلونک عن الانفال الایۃ آپ نے یہ آیت لکارہون (آیت ٥ الانفال) تک تلاوت فرمائی۔ اللہ تعالیٰ نے فرمایا تم اس غنیمت کے سلسلہ میں میرا حکم مانو ! جیسا کہ تم نے میرے حکم کا انجام پہلے دیکھ لیا کہ تم ناپسندیدگی کے ساتھ نکلے اور اللہ تعالیٰ نے تمہیں فتح دے دی۔ پس آپ نے ان کے مابین برابر تقسیم کردیا۔ ذرا غور سے دیکھو کہ جناب رسول اللہ (صلی اللہ علیہ وآلہ وسلم) نے تمام مال غنیمت کو ان کے مابین تقسیم کردیا جیسا کہ اللہ تعالیٰ نے یسئلونک عن الانفال الایہ اتار کر فرمایا۔ اللہ تعالیٰ نے اس میں اپنی طرف اس کی نسبت بطور فرض کے اور جناب رسول اللہ (صلی اللہ علیہ وآلہ وسلم) کی طرف بطور تملیک کے فرمائی ہے۔