٦٤٤: ابو الاسود نے بیان کیا کہ میں نے عروہ کو یہ خبر حضرت عائشہ (رض) سے بیان کرتے سنا کہ ہم ایک غزوہ سے جناب رسول اللہ (صلی اللہ علیہ وآلہ وسلم) کی معیت میں لوٹ رہے تھے جب ہم ایک منزل پر رات کے پچھلے حصہ میں آرام کے لیے اترے جو مدینہ سے قریب تھی تو رات کی وجہ سے مجھے اونگھ آگئی میرے ہاں سمط نامی ہار تھا جو گلے میں ڈالنے سے ناف تک پہنچنے والا تھا اونگھ کی شدت کی وجہ سے وہ میری گردن سے نکل گیا اور گرگیا جب میں نماز صبح کے لیے جناب رسول اللہ (صلی اللہ علیہ وآلہ وسلم) کے ساتھ اتری تو میں نے کہا یارسول اللہ (صلی اللہ علیہ وآلہ وسلم) گردن سے میرا ہار گرپڑا ہے آپ (صلی اللہ علیہ وآلہ وسلم) نے اعلان فرما دیا تمہاری ماں کا ہار گم ہوگیا ہے اسے تلاش کرو لوگ اس کی تلاش میں لگ گئے لوگوں کے پاس پانی نہیں تھا ادھر تلاش میں نماز کا وقت آگیا ہار مل گیا لیکن پانی میسر نہ آیا بعض نے گٹوں تک تیمم کیا اور بعض نے کندھے تک تیمم کیا اور بعض نے تمام جسم پر جناب رسول اللہ (صلی اللہ علیہ وآلہ وسلم) کو اس کی اطلاع ہوئی تو اللہ تعالیٰ نے آیت تیمم اتار دی۔ اس روایت سے یہ معلوم ہوگیا کہ آیت کا نزول اس عمل کے بعد ہوا ہے جس میں اختلاف کیا جا رہا ہے کہ بعض نے کندھوں تک تیمم کیا۔ اس سے یہ بھی ثابت ہوا کہ اصل تیمم تو ان کے ہاں ثابت شدہ تھا۔ رہا حضرت عائشہ صدیقہ (رض) کا یہ ارشاد کہ اللہ تعالیٰ نے تیمم کی آیت نازل فرمائی۔ اس سے یہ ظاہر ہوگیا کہ آیت تیمم کے بعد انھوں نے جو عمل کیا وہ تیمم کا اصل طریقہ ہے۔ ہمارے ہاں حضرت عمار (رض) کی روایت کا یہی مطلب ہے اور اس پر دلالت کے لیے آیت ہی کو دیکھ لو کہ وہ ان کے عمل کی نفی کر رہی ہے اور دوسری طرف عما ربن یاسر (رض) نے جناب نبی اکرم (صلی اللہ علیہ وآلہ وسلم) سے اپنے عمل کے خلاف روایت نقل کی ہے۔ روایات ملاحظہ کریں۔
تخریج : ابو داؤد فی الطھارۃ باب ١٢١ نمبر ٣١٧ ۔
حاصل روایات : یہ ہے کہ آیت تیمم کا کچھ حصہ اتر چکا تھا اسی کے مطابق انھوں نے پانی نہ ہونے کی صورت میں تیمم کیا اور سب نے اپنے اپنے انداز سے کیا کیونکہ ابھی کوئی مقررہ کیفیت نہ اتری تھی فانزل اللہ ایۃ التیمم کا مطلب یہ ہوا کہ تیمم کی مکمل کیفیت نازل فرما دی معلوم ہوا کہ یہ تیمم آیت کا بقیہ حصہ اترنے سے پہلے کا واقعہ ہے اور حضرت عمار (رض) کی روایت میں یہی کیفیت سابقہ مذکور ہے اور اس پر مزید ثبوت درکار ہو تو خود حضرت عمار (رض) کی روایت اس سلسلہ میں ملاحظہ ہو۔