٦٦٠٧: عبدالرحمن بن طرفہ نے عرفجہ (رض) سے اسی طرح کی روایت نقل کی ہے۔ جناب رسول اللہ (صلی اللہ علیہ وآلہ وسلم) نے عرفجہ بن اسعد (رض) کے لیے سونے کی ناک کی اجازت اس لیے مرحمت فرمائی کہ چاندی کی ناک گوشت میں تعفن پیدا کرتی تھی۔ جب ناک کا یہ حکم ہے تو دانت کا بھی یہی حکم ہے کہ اس کو سونے سے باندھنے کی اس وقت اجازت ہے جبکہ دیگر اشیاء سے باندھنا خرابی کا باعث ہو۔ چاندی وغیرہ کے دانت کا تعفن پیدا کرنا سونے کے استعمال کو مباح کرنے والا ہے۔ جیسا کہ چاندی کی ناک کا تعفن سونے کی ناک کو مباح کرنے کا باعث تھا۔ پس یہ ایک دلیل ہے۔ ہم دیکھتے ہیں کہ چاندی کا استعمال اسی طرح مکروہ و ناجائز ہے جیسا کہ سونے کا استعمال ناجائز و مکروہ ہے جب دونوں کا درجہ کراہت میں برابر ہے اور ممانعت میں دونوں شامل ہیں اور دانت کا چاندی سے باندھنا استعمال مکروہ سے خارج ہے تو سونے سے باندھنا بھی اسی طرح ہوگا یعنی استعمال حرام سے خارج شمار ہوگا۔ چاندی کی انگوٹھی مردوں کے لیے مباح ہے مگر سونے کی انگوٹھی مباح نہیں تو ان کی چاندی کی ایک مقدار مباح کردی گئی جو سونے میں مباح نہیں کی گئی۔ (پس دونوں کا حکم یکساں نہ رہا) تو اس کے جواب میں کہا جائے گا کہ نظر کا تقاضا تو اسی طرح تھا کہ جس طرح چاندی کی انگوٹھی مردوں کے لیے مباح ہے سونے کی انگوٹھی کا بھی یہی حکم ہو۔ لیکن اس کی ممانعت کردی گئی اور سونے کی انگوٹھی کے ممنوع ہونے میں نص وارد ہے اسی کو اختیار کیا اور قیاس کو ترک کردیا اگر نص نہ ہوتی تو اس کو بھی اباحت میں وہی درجہ حاصل ہوتا جو چاندی کو ہے۔ اسی طرح دانت کا باندھنا جب چاندی میں مباح ہے تو سونے سے بھی مباح ہے جب تک کہ ان کے مابین تفریق کے لیے اسی طرح سنت کی دلیل نہ آجائے جس سے قیاس کا چھوڑنا لازم ہوجائے جیسا کہ سونے کی انگوٹھی کے متعلق سنت وارد ہوئی ہے جس سے اس کی ممانعت کردی گئی اور اس سے حجت تمام ہو کر ترک قیاس لازم ہوا۔ پس ان دونوں دلیلوں سے امام محمد (رح) کا مؤقف ثابت ہوگیا۔ اگر کوئی معترض کہے کہ سونے کی انگوٹھی کے متعلق وہ کون سی روایت ہے جو اس کی ممانعت ثابت کرتی ہے۔ ان کو جواب میں کہے کہ اس سلسلہ میں آپ (صلی اللہ علیہ وآلہ وسلم) سے متواتر آثار مروی ہیں ہم ان کو باب النہی عن خاتم الذہب میں ان شاء اللہ ذکر کریں گے۔
دانت کے باندھنے کا متقدمین سے ثبوت :