٦٧٨٥: ابو زرعہ کہتے ہیں کہ میں ابوہریرہ (رض) کے ساتھ دار مروان میں داخل ہوا تو اچانک اس میں مورتیوں کو دیکھا تو حضرت ابوہریرہ (رض) نے فرمایا جناب رسول اللہ (صلی اللہ علیہ وآلہ وسلم) نے فرمایا کہ اللہ تعالیٰ نے فرمایا ہے اس سے بڑا ظالم کون ہے جو میری مخلوق کی طرح مخلوق بنانے لگا۔ پس ان کو چاہیے کہ وہ ایک ذرہ بنا کردکھائیں یا ایک دانہ بنا کردکھائیں یا ایک جو بنا کردکھائیں۔ امام طحاوی (رح) فرماتے ہیں : کہ ایک جماعت علماء کی اس طرف گئی ہے کہ اس کپڑے کا استعمال جس میں تصاویر ہوں خواہ اس کو پاؤں میں روندا جائے تاکہ اس کی تذلیل کی جائے یا اس کو پہنا جائے بہرحال اس کا استعمال مکروہ ہے بلکہ اس کا گھروں کے اندر رکھنا بھی مکروہ ہے انھوں نے ان آثار سے استدلال کیا ہے۔ فریق ثانی کا مؤقف ہے کہ جن تصاویر والے کپڑے کو روندا یا اس کی تذلیل کی جاتی ہے اس کے استعمال میں کوئی حرج نہیں اور اس کے علاوہ مکروہ ہے ان کی دلیل یہ روایات ہیں۔
تخریج : بخاری فی اللباس باب ٩٠‘ والتوحید باب ٥٦‘ مسلم فی اللباس روایت ١٠١۔