٦٨٣٣: عطاء نے جابر (رض) سے اور انھوں نے عبدالرحمن بن عوف (رض) سے روایت کی کہ آپ نے میرا ہاتھ پکڑا اور میں آپ کے ساتھ آپ کے بیٹے ابراہیم کی طرف گیا وہ جانکنی کے عالم میں تھا چنانچہ نبی اکرم (صلی اللہ علیہ وآلہ وسلم) نے اسے اپنی گود میں لٹا لیا۔ یہاں تک کہ اس کی روح پرواز کرگئی پھر اس کو رکھ دیا اور رونے لگے میں نے کہا یارسول اللہ (صلی اللہ علیہ وآلہ وسلم) کیا آپ روتے ہیں حالانکہ آپ تو رونے سے منع فرماتے ہیں آپ (صلی اللہ علیہ وآلہ وسلم) نے فرمایا میں نے رونے سے منع نہیں کیا لیکن میں نے فاجرین کی دو احمق آوازوں سے منع کیا ہے ایک خوشی کے وقت لہو و لعب کے گانے اور شیطانی باجوں کی آواز اور مصیبت کے وقت کی آواز جس میں چہروں پر تھپڑ مارے جائیں اور گریبان کو پھاڑا جائے۔ باقی یہ تو رحمت کے آنسو ہیں جو رحم نہیں کرتا اس پر رحم نہیں کیا جاتا اے ابراہیم اگر یہ بات نہ ہوتی کہ اللہ تعالیٰ کا وعدہ سچا ہے اور اس کا قول برحق ہے اور ہمارا پچھلا عنقریب پہلے سے جا ملے گا تو ہم ضرور تم پر اس سے بھی زیادہ غم کرتے اور بیشک تمہاری وجہ سے ہم غم گین ہیں آنکھ رو رہی ہے اور دل غمزدہ ہے اور ہم وہ بات نہیں کہتے جس سے ہمارا رب ناراض ہو۔ اس روایت میں اس رونے کی وضاحت کردی جس کو پہلی روایات میں ممنوع قرار دیا گیا اس سے مراد ایسا رونا ہے جس کے ساتھ چیخ و پکار ‘ چہروں کا پیٹنا اور گریبان کا پھاڑنا ہو اور یہ بھی وضاحت کردی کہ اس کے علاوہ رونا رحمت ہے۔ یہ ممنوعہ رونے سے مختلف ہے۔ حضرت ابن عمر (رض) اور حضرت عمر (رض) والی روایات کہ ” ان المیت یعذب ببکاء اہلہ علیہ “ ہم نے حضرت عائشہ (رض) سے اس کا انکار نقل کردیا کہ جناب رسول اللہ (صلی اللہ علیہ وآلہ وسلم) نے فرمایا اللہ تعالیٰ قبر میں کافر کی سزا میں اضافہ فرماتے ہیں جبکہ اس کے گھر والے اس پر روتے ہیں اور یہ بھی ممکن ہے کہ اس سے وہ رونا مراد ہو جس کی وہ اپنی زندگی میں وصیت کرتا تھا کہ اس کی موت کے بعد رویا جائے۔ زمانہ جاہلیت میں نوحہ و بین کی وصیت کر جاتے کہ وہ ان کی موت کے بعد اس طرح روئیں۔ پس اللہ تعالیٰ اس رونے کے سبب سے اس کافر کو قبر میں بھی عذاب دیتا ہے کیونکہ وہ زندگی میں اس کا سبب بنا اور اس کی موت کے بعد کیا گیا یہ روایت حضرت عائشہ (رض) سے ان الفاظ کے علاوہ دیگر الفاظ سے بھی مروی ہے۔ (ملاحظہ ہو)
تخریج : ترمذی فی الجنائز باب ٢٥۔