٧٠٨٠: ابو مجالد نے حضرت انس (رض) سے روایت کی ہے کہ جب جناب نبی اکرم (صلی اللہ علیہ وآلہ وسلم) نے زینب بنت جحش سے شادی کی تو لوگوں کو بلایا پس انھوں نے کھانا کھایا پھر باتیں کرنے بیٹھ گئے تو آپ نے اس طرح کا عمل کیا گویا آپ اٹھانا چاہتے ہیں مگر وہ لوگ نہ اٹھے۔ پھر جب آپ نے یہ دیکھا تو آپ اٹھے اور آپ کے ساتھ اٹھنے والے اٹھ گئے مگر ان میں سے تین بیٹھے رہے۔ پھر جناب نبی اکرم (صلی اللہ علیہ وآلہ وسلم) تشریف لائے اور گھر میں داخل ہوئے تو اچانک وہ لوگ بیٹھے تھے پھر وہ اٹھ کر چلے گئے اور میں نے آ کر جناب نبی اکرم (صلی اللہ علیہ وآلہ وسلم) کو خبر دی کہ وہ چلے گئے ہیں تو آپ تشریف لائے اور داخل ہوئے تو یہ آیت حجاب اتری۔ ” یا ایہا الذین امنوا لاتدخلوا “ (الاحزاب : ٥٣) امام طحاوی (رح) کہتے ہیں : امہات المومنین کو اس حجاب سے خاص کیا گیا جس میں دوسرے لوگوں کو ان کی طرح قرار نہیں دیا گیا۔ اللہ تعالیٰ نے فرمایا : ” وقل للمومنات یغضضن من ابصارہن “ (النور : ٣١) پھر فرمایا ” ولا یبدین زینتہن الا ماظہر منہا “ (النور : ٣١) تو اس آیت میں لونڈیوں کو ذی رحم محرم کی طرح قرار دیا گیا۔ لونڈیوں کو اس طرح قرار نہیں دیا جس طرح آپ نے خیال کیا بلکہ مستثنیٰ جماعت کا ذکر کیا جن کو ” ولا یبدین زینتہن “ سے نکالا گیا تو اس میں خاوندوں ‘ باپوں اور اس کے ساتھ جن کو ان کی مثل ذکر کیا اور لونڈی ‘ غلاموں کا تذکرہ کیا تو ان کو جمع کرنا اس بات کی دلیل نہیں کہ ان کے احکام ایک جیسے ہیں کیونکہ ہم دیکھتے ہیں کہ خاوند کو عورت کے وہ مقامات بھی دیکھنے درست ہیں جن کو عورت کا باپ بھی نہیں دیکھ سکتا۔ پھر فرمایا جو تمہاری ملک ہوں تو ان کو پہلے لوگوں سے ملانا اس دلیل سے نہیں کہ ان کا حکم ان کی طرح ہے بلکہ اس آیت سے غلاموں کے لیے عورتوں کے وہ حصے دیکھنے کی اجازت دی گئی جو زینت میں سے ظاہر میں اور وہ چہرہ اور ہتھیلیاں ہیں اور اسے غلاموں کے لیے جائز قرار دیا حالانکہ وہ محارم نہیں۔ یہ اس بات کی دلیل ہے کہ جو آزاد لوگ محارم نہیں ان کا بھی یہی حکم ہے اور یہ مفہوم حضرت عبداللہ بن زمعہ (رض) کی روایت میں جناب رسول اللہ (صلی اللہ علیہ وآلہ وسلم) کے قول ” احتجبی منہ “ میں حضرت سودہ (رض) کو آپ نے بیان فرمایا تو آپ نے ان کو ان سے پردہ کرنے کا حکم دیا حالانکہ وہ ان کے باپ کی لونڈی کے بیٹے ہیں اور یہاں دو باتیں ہیں۔ یا تو وہ ان کے بھائی ہیں۔ ! ان کے والد کی لونڈی کے بیٹے ہیں تو اس اعتبار سے ان کے اور ان کے والد کے تمام ورثاء کے مملوک ہیں۔ تو اس سے معلوم ہوا کہ آپ (صلی اللہ علیہ وآلہ وسلم) سے ان کو ان سے پردہ اس لیے نہیں کروایا کہ وہ ان کے بھائی تھے بلکہ اس لیے کہ وہ ان کے بھائی نہ تھے اور وہ اس حالت میں غلام تھے تو ان کے غلام ہونے کی وجہ سے حضرت سودہ (رض) کو انھیں دیکھنا جائز نہ تھا تو اس طرح یہ روایت حضرت ام سلمہ (رض) والی روایت کی ضد ہے اور جو آیت ہم نے ذکر کی ہے وہ اس شخص کے نزدیک جس نے حضرت سودہ (رض) والی روایت سے استدلال کیا ہے وہ تمام عورتوں سے متلعق ہے صرف امہات المومنین کے ساتھ خاص نہیں اور امہات المومنین کے غلام ان کی طرف دیکھنے کے حکم میں ان رشتہ داروں کی طرح تھے جو ان امہات المومنین کے رشتہ دارو نہیں تھے۔ محارم کے حکم میں نہ تھے اور جن کو امہات المومنین کے ساتھ رشتہ محرمیت حاصل تھا وہ اس ممانعت کے سلسلہ میں ان رشتہ داروں کی طرح ہیں جو ان کے لیے حرام ہیں۔ دونوں اقوال میں سے درست تر قول کو نکالنے کے لیے ہم نے قیاس کی طرف رجوع کیا تو ہم نے دیکھا کہ محارم کے لیے عورت کو دیکھنے کی اجازت ہے محرم چہرہ ‘ سینہ ‘ بال ‘ گھٹنوں سے نیچے حصہ کو دیکھ سکتا ہے اور دیگر اقارب صرف اس کے چہرہ اور ہتھیلیوں کو دیکھ سکتے ہیں۔ پھر ہم نے نظر ڈالی کہ اس پر حرام ہے کہ وہ عورت کے کھلے ہوئے سینے یا پنڈلیوں کی طرف دیکھے خواہ وہ اس عورت کا غلام ہو یا کسی اور کا غلام ہو۔ جب اس بات میں غلام اجنبی کے حکم میں ہے محرم رشتہ دار کی طرح نہیں تو بالوں کے سلسلہ میں بھی قیاس کا یہی تقاضا ہے۔ اور امام ابوحنیفہ ‘ ابو یوسف ‘ محمد رحمہم اللہ کا یہی قول ہے۔
تخریج : بخاری فی تفسیر سورة ٢‘ باب ٩‘ سورة ٣٣‘ باب ٨‘ والاطعمہ باب ٥٩‘ والاستیذان باب ١٠‘ مسلم فی النکاح ٩٨؍٩٣‘ والسلام ١٨‘ ترمذی فی تفسیر سورة ٣٣‘ باب ٢٠‘ مسند احمد ١؍٢٤‘ ١٠٥؍٣‘ ٦؍٢٢٣۔
اقوالِ متقدمین سے تائید :
ان کی موافقت میں حضرت حسن بصری اور شعبی رحمہم اللہ کا قول موجود ہے۔