٧٠٨٢: محمد بن حنفیہ نے حضرت علی (رض) سے روایت کی ہے کہ میں نے کہا یارسول اللہ (صلی اللہ علیہ وآلہ وسلم) اگر میرے ہاں بیٹا پیدا ہو تو کیا میں اس کا نام آپ کے نام پر اور اس کی کنیت آپ کی کنیت پر رکھ لوں۔ آپ نے فرمایا ہاں (اجازت ہے) اور راوی کہتے ہیں کہ یہ اجازت صرف حضرت علی (رض) کے لیے تھی۔ امام طحاوی (رح) کہتے ہیں : ایک جماعت کا خیال ہے کہ ابوالقاسم کی کنیت میں کوئی حرج نہیں اور اس کے ساتھ محمد نام رکھنے میں کوئی حرج نہیں۔ انھوں نے اس روایت کو دلیل بنایا۔ باقی اس روایت میں تخصیص کا قول نہ تو جناب رسول اللہ (صلی اللہ علیہ وآلہ وسلم) کا ہے اور نہ حضرت علی (رض) کا ہے بلکہ کسی راوی کا ہے۔ اب یہ بھی ممکن ہے کہ یہ درست ہو اور ممکن ہے کہ درست نہ ہو۔ کنیت و اسم گرامی ہر دو کے جواز کی دلیل یہ ہے کہ صحابہ کرام کے زمانہ میں ایک جماعت کے یہ نام پائے جاتے ہیں کہ ان کی کنیت و نام دونوں یہی تھے مثلاً محمد بن طلحہ ‘ محمد بن اشعث ‘ محمد بن ابی حذیفہ رحمہم اللہ۔ اگر یہ جناب علی (رض) کی خصوصیت ہوتی تو دوسرے یہ نام نہ رکھتے اور دیگر احباب بھی اس پر تنقید کرتے (مگر کسی سے منقول نہیں) یہ حضرت علی (رض) سے خاص تھی اور اس کی دلیل خود روایت میں وارد ہے (ملاحظہ ہو)
تخریج : ابو داؤد فی الادب باب ٦٨‘ ترمذی فی الادب باب ٦٨‘ مسند احمد ١؍٩٥۔
خلاصہ الزام :
علماء کی ایک جماعت کا قول ابو قاسم کی کنیت اور محمد نام رکھنے میں اب کوئی حرج و قباحت نہیں ہے۔