(٣١٧٤٠) اسماعیل بن عبد الملک فرماتے ہیں کہ میں نے حضرت سعید بن جبیر (رض) سے ایک بیٹی اور دو چچا کے بیٹوں کے بارے میں پوچھا جن میں سے ایک ماں شریک بھائی تھا، انھوں نے فرمایا : بیٹی کے لیے نصف مال ہے اور باقی اس چچا زاد بھائی کے لیے ہے جو ماں شریک بھائی نہیں، اور ماں شریک بھائی اولاد کے ہوتے ہوئے وارث نہیں ہوتا، راوی فرماتے ہیں کہ پھر میں نے حضرت عطاء سے پوچھا تو انھوں نے فرمایا کہ حضرت سعید سے غلطی ہوئی، بیٹی کے لیے نصف مال ہے اور باقی ان دونوں کے درمیان آدھا آدھا تقسیم ہوگا،
حضرت ابوبکر فرماتے ہیں کہ یہ مسئلہ حضرت سعید بن جبیر (رض) کے قول کے مطابق دو حصّوں سے نکلے گا، بیٹی کے لیے نصف ، اور اس چچا زاد بھائی کے لیے جو ماں شریک بھائی نہیں ہے نصف مال ہوگا، اور حضرت عطاء (رض) کے قول کے مطابق چار حصّوں سے نکلے گا۔ دو حصّے بیٹی کے لیے ہوں گے اور دو حصّے ان کے درمیان تقسیم ہوں گے۔