(٣١٩١١) حضرت شعبی فرماتے ہیں کہ :
(١) حقیقی بہن، باپ شریک بھائی اور بہن اور دادا کے بارے میں حضرت علی کا فرمان ہے کہ حقیقی بہن کے لیے آدھا مال ہے اور بقیہ مال دادا اور باپ شریک بھائی اور بہن کے درمیان اس طرح تقسیم ہوگا کہ مال کے پانچ حصّے کیے جائیں گے، ان میں سے دو حصّے دادا کو اور ایک حصّہ بہن کو دیا جائے گا، اور حضرت عبداللہ (رض) کے فرمان کے مطابق حقیقی بہن کے لیے آدھا مال اور دادا کے لیے بقیہ مال ہے، اور باپ شریک بھائی اور بہن کے لیے کچھ نہیں، اور حضرت زید (رض) کے فرمان کے مطابق یہ مسئلہ اٹھارہ حصّوں سے نکالا جائے گا، دادا کو چھ حصّے یعنی ایک تہائی مال ، باپ شریک بھائی کو چھ حصّے ، باپ شریک بہن کو تین حصّے اور حقیقی بہن کو تین حصّے دیے جائیں گے، پھر باپ شریک بھائی اور بہن چھ حصّے حقیقی بہن پر لوٹائیں گے، اس طرح حقیقی بہن کا حصّہ نو حصّے یعنی آدھا مال ہوجائے گا، اور باپ شریک بھائی بہن کے لیے تین حصّے بچیں گے، دو حصّے بھائی کے لیے اور ایک حصّہ بہن کے لیے ہوگا۔
(٢) اور دو حقیقی بہنوں، ایک باپ شریک بھائی اور دادا کے مسئلے کے بارے میں حضرت علی (رض) فرماتے ہیں کہ حقیقی بہنوں کے لیے دو تہائی مال ہے اور بقیہ مال دادا اور بھائی کے درمیان تقسیم کیا جائے گا۔ اور حضرت عبداللہ (رض) فرماتے ہیں کہ دو حقیقی بہنوں کے لیے دو تہائی مال ہے اور بقیہ مال دادا کے لیے ہے، اور باپ شریک بھائی کے لیے کچھ نہیں، اور حضرت زید (رض) کے فرمان کے مطابق مال تین حصّوں میں تقسیم کیا جائے گا، ایک حصّہ دادا کے لئے، ایک بھائی کے لیے اور ایک حصّہ دو بہنوں کے لئے، پھر باپ شریک بھائی دو حقیقی بہنوں پر اپنا حصّہ لوٹا دے گا، اس طرح بہنوں کا دو تہائی حصّہ پورا ہوجائے گا اور بھائی کے لیے کچھ نہیں بچے گا۔
(٣) اور دو حقیقی بہنوں، ایک باپ شریک بہن اور دادا کے بارے میں حضرت علی اور عبداللہ (رض) فرماتے ہیں کہ دونوں حقیقی بہنوں کے لیے دو تہائی مال ہے اور بقیہ مال دادا کے لیے ہے، اور باپ شریک بہن کے لیے کچھ نہیں، اور حضرت زید (رض) فرماتے ہیں کہ مال پانچ حصّوں میں تقسیم کیا جائے گا، دو حصّے دادا کے لئے، دو حصّے دونوں حقیقی بہنوں کے لیے اور ایک حصّہ باپ شریک بہن کے لئے، پھر باپ شریک بہن دونوں حقیقی بہنوں پر اپنا حصّہ لوٹا دیں گی اور اس کے لیے کچھ نہیں رہے گا۔
(٤) اور دو حقیقی بہنوں، ایک باپ شریک بھائی اور بہن اور دادا کے بارے میں حضرت علی (رض) فرماتے ہیں کہ دونوں حقیقی بہنوں کے لیے دو تہائی مال اور دادا کے لیے مال کا چھٹا حصّہ ہے، اور بقیہ مال دونوں باپ شریک بہن اور بھائی کے درمیان اس ضابطے پر تقسیم ہوگا کہ مرد کو عورت سے دوگنا دیا جائے گا، اور حضرت عبداللہ (رض) فرماتے ہیں کہ دونوں حقیقی بہنوں کے لیے دو تہائی مال ہے اور دادا کے لیے بقیہ مال ، اور باپ شریک بھائی اور بہن کے لیے کچھ نہیں، اور حضرت زید (رض) فرماتے ہیں کہ مال کو پندرہ حصّوں میں تقسیم کیا جائے گا، دادا کے لیے پانچ حصّے ایک تہائی مال، باپ شریک بھائی کے لیے چار حصّے ، باپ شریک بہن کے لیے دو حصّے اور دو حقیقی بہنوں کے لیے چار حصّے، پھر باپ شریک بھائی اور بہن دونوں حقیقی بہنوں پر اپنا حصّہ لوٹا دیں گے، اس طرح ان کا دو تہائی حصّہ ہوجائے گا اور باپ شریک بھائی بہن کے لیے کچھ نہیں ہوگا۔
(٥) اور دو حقیقی بہنوں اور دو باپ شریک بہنوں اور دادا کے بارے میں حضرت علی اور عبداللہ (رض) فرماتے ہیں کہ دو حقیقی بہنوں کے لیے دو تہائی مال ہے اور باقی مال دادا کے لیے ہے، اور باپ شریک بہنوں کے لیے کچھ نہیں، اور حضرت زید (رض) فرماتے ہیں کہ مال چھ حصّوں میں تقسیم کیا جائے گا دو حصّے دادا کے لئے، دو حصّے دو حقیقی بہنوں کے لیے اور دو حصّے دو باپ شریک بہنوں کے لئے، پھر باپ شریک بہنیں حقیقی بہنوں پر اپنے حصّے لوٹا دیں گی، اس طرح حقیقی بہنوں کا دو تہائی مال پورا ہوجائے گا اور باپ شریک بہنوں کے لیے کچھ نہیں بچے گا۔
(٦) اور حقیقی بہن اور تین باپ شریک بہنوں اور دادا کے بارے میں حضرت علی اور عبداللہ (رض) فرماتے ہیں کہ حقیقی بہنوں کے لیے آدھا مال اور باپ شریک بہنوں کے لیے مال کا چھٹا حصّہ ہے دو تہائی مال پورا کرنے کے لئے، اور بقیہ مال دادا کے لیے ہے، اور حضرت زید (رض) فرماتے ہیں کہ مال اٹھارہ حصّوں میں تقسیم کیا جائے گا : چھ حصّے دادا کے لئے، تین حصّے حقیقی بہن کے لیے اور نو حصّے باپ شریک بہنوں کے لیے ہیں، پھر باپ شریک بہنیں حقیقی بہن پر چھ حصّے لوٹا دیں گی، اس طرح حقیقی بہن کو حصّہ آدھا مال ہوجائے گا ، اور باپ بہنوں کے لیے ایک حصّہ بچے گا۔
(٧) اور دو حقیقی بہنوں اور ایک باپ شریک بھائی اور دو باپ شریک بہنوں اور دادا کے مسئلے کے بارے میں حضرت علی (رض) کا فرمان ہے کہ دونوں حقیقی بہنوں کو دو تہائی مال اور دادا کو مال کا چھٹا حصّہ دیا جائے گا، اور باقی مال باپ شریک بھائی اور بہنوں کے درمیان اس ضابطے پر تقسیم ہوگا کہ مرد کو عورت سے دوگنا دیا جائے گا ، اور حضرت عبداللہ (رض) کے قول میں دونوں حقیقی بہنوں کے لیے دو تہائی مال ہے اور بقیہ مال دادا کے لیے ہے، اور باپ شریک بھائی اور بہنوں کے لیے کچھ نہیں ہے
(٨) اور ماں ، بہن اور دادا کے بارے میں حضرت علی (رض) کا فرمان ہے کہ بہن کے لیے آدھا مال ہے اور ماں کے لیے بقیہ مال کا ایک تہائی ، اور باقی مال دادا کے لیے ہے، اور حضرت زید (رض) کے فرمان کے مطابق مال کو نو حصّوں میں تقسیم کیا جائے گا، تین حصّے یعنی ایک تہائی مال ماں کے لیے ، چار حصّے دادا کے لیے اور د و حصّے بہن کے لیے ہوں گے، حضرت زید (رض) دادا کی موجودگی میں بہن کو بھائی کے قائم مقام قرار دیتے ہیں، اور حضرت عثمان (رض) فرماتے ہیں کہ ایک تہائی مال ماں کو، ایک تہائی دادا کو اور ایک تہائی بہن کو دیا جائے گا، اور حضرت ابن عباس (رض) فرماتے ہیں کہ ایک تہائی مال ماں کے لیے ہے اور باقی مال دادا کے لیے ہے، اور بہن کے لیے کچھ نہیں، آپ بھائی اور بہن کو دادا کی موجودگی میں کسی چیز کا وارث نہیں بناتے تھے۔