٦٥٧٢: ابو عشانہ معافری کہتے ہیں کہ میں نے حضرت عقبہ بن عامر (رض) جہنی کو جناب رسول اللہ (صلی اللہ علیہ وآلہ وسلم) کے متعلق یہ خبر دیتے سنا کہ آپ اپنے اہل کو زیور و ریشم سے منع فرماتے اور فرماتے اگر تم جنت کا زیور و ریشم پسند کرتی ہو۔ تو اس کو دنیا میں مت پہنو۔ جناب رسول اللہ (صلی اللہ علیہ وآلہ وسلم) کا قول ” من لبسہ فی الدنیا “ ۔۔۔اس سے مراد فقط مرد بھی ہوسکتے ہیں۔ ! مراد بقول تمہارے مرد و عورتیں دونوں ہوں اور ہم نے حضرت علی ‘ ابن عمر ‘ زید بن ارقم ‘ ابو موسیٰ (رض) کی روایات ذکر کی ہیں انھوں نے جناب نبی اکرم (صلی اللہ علیہ وآلہ وسلم) سے نقل کیا کہ اس سے مراد مرد ہیں عورتیں نہیں۔ پس یہ احتمال متعین ہوا۔ یہ مطلب لینے سے دونوں روایات میں تضاد نہ رہے گا۔ اگر ابن عمر (رض) اور ابن زبیر (رض) کی بات کو وہ حجت قرار دیتے ہیں تو حضرت علی (رض) کا قول ان سے بڑھ کر حجت ہے اور اب تو فیصلہ ہی ہوگیا کہ حضرت ابن عمر (رض) نے جناب نبی اکرم (صلی اللہ علیہ وآلہ وسلم) سے اپنے قول کے خلاف اور حضرت علی (رض) کے قول کی حمایت میں نقل کیا ہے۔
تخریج : نسائی فی الزینہ باب ٣٩۔