٦٥٧٣: نافع نے ابن عمر (رض) سے روایت کی ہے جناب عمر (رض) نے عطارد تمیمی کو دیکھا کہ ایک ریشمی دھاری دار جوڑے کی قیمت لگا رہا ہے تو حضرت عمر (رض) نے عرض کیا یا رسول اللہ (صلی اللہ علیہ وآلہ وسلم) ! اگر آپ اس کو عرب کے وفود کی آمد پر پہننے کے لیے خرید لیں تو مناسب ہے تو جناب رسول اللہ (صلی اللہ علیہ وآلہ وسلم) نے فرمایا۔ دنیا میں تو وہ ریشم پہنتا ہے جس کا آخرت میں حصہ نہیں ہے جب جناب رسول اللہ (صلی اللہ علیہ وآلہ وسلم) کے ہاں دھاری دار ریشمی جوڑے آئے تو آپ نے عمر (رض) کی طرف ایک جوڑا اور ایک جوڑا اسامہ کو اور ایک جوڑا علی (رض) کو عنایت فرمایا اور ان کو حکم دیا کہ وہ عورتوں کے مابین دوپٹے کے لیے کاٹ کر دے دیں۔ راوی کہتے ہیں کہ اسامہ اپنا جوڑا لے کر جانے لگے تو جناب نبی اکرم (صلی اللہ علیہ وآلہ وسلم) نے ان کی طرف اس طرح دیکھا گویا انھوں نے ان کے اس عمل کو ناپسند کیا ہے تو آپ نے فرمایا کہ میں نے یہ تمہارے پاس اس لیے نہیں بھیجا کہ تم اسے پہنو بلکہ اس لیے بھیجا ہے کہ اسے پھاڑ کر عورتوں کے دوپٹے بنا لو۔