٦٨٢٧: ابن ابی ملیکہ کہتے ہیں کہ جب ام عمان بنت عثمان فوت ہوگئیں تو میں بھی لوگوں کے ساتھ جنازے میں گیا میں ابن عمر (رض) اور ابن عباس (رض) کے اگلی جانب بیٹھا عورتیں رونے لگیں تو ابن عمر (رض) نے فرمایا تم ان کو رونے سے کیوں نہیں منع کرتے میں نے جناب رسول اللہ (صلی اللہ علیہ وآلہ وسلم) سے سنا ہے کہ میت کو اس کے بعض گھر والوں کے رونے سے عذاب ملتا ہے ابن عباس (رض) کہنے لگے یہ بات عمر (رض) بھی کہا کرتے تھے میں ایک دن عمر (رض) کے ساتھ نکلا ہم جب مقام بیدا میں پہنچے تو اچانک ایک قافلہ سامنے آیا آپ نے فرمایا اے ابن عباس (رض) یہ کن کا قافلہ ہے میں ان کی طرف گیا تو وہ صہیب اور ان کے گھر والے تھے میں واپس لوٹا اور میں نے بتلایا امیرالمومنین (رض) ! یہ صہیب اور ان کے گھر والے ہیں جب ہم مدینہ میں داخل ہوئے اور حضرت عمر (رض) زخمی ہوگئے تو حضرت صہیب ان کے پاس بیٹھ کر رونے لگے اور کہہ رہے تھے اے میرے پیارے ‘ اے میرے ساتھی حضرت عمر (رض) نے کہا مت رو بیشک میں نے رسول اللہ (صلی اللہ علیہ وآلہ وسلم) کو فرماتے سنا بیشک میت اس کے بعض گھر والوں کے رونے پر عذاب دی جاتی ہے راوی کہتے ہیں اس بات کا تذکرہ حضرت عائشہ (رض) کے سامنے کیا گیا تو انھوں نے فرمایا اللہ کی قسم تم اس روایت کو جھوٹے لوگوں کی طرف سے بیان نہیں کرتے لیکن سننے میں غلطی ہوجاتی ہے بیشک تمہارے لیے قرآن مجید میں ایسی بات ہے جو اس سے شفاء بخشنے والی ہے : الا تزر وازرۃ وزر اخری ۔ لیکن رسول اللہ (صلی اللہ علیہ وآلہ وسلم) نے فرمایا بیشک اللہ تعالیٰ کافر کے عذاب میں اضافہ فرما دیں گے اس کے بعض گھر والوں کے اس پر رونے کی وجہ سے۔
تخریج : بخاری فی الجنائز باب ٣٢‘ مسلم فی الجنائز باب ٢٢‘ نسائی فی الجنائز باب ١٥۔