٦١١٥: وہب بن جریر اور روح بن عبادہ دونوں نے شعبہ سے روایت کی ہے۔

٦١١٦: ابراہیم بن مرزوق نے اپنی سند سے مری بن قطری تغلبی سے روایت کی انھوں نے عدی بن حاتم سے روایت کرتے ہوئے بیان کیا کہ میں نے عرض کیا یارسول اللہ (صلی اللہ علیہ وآلہ وسلم) میں اپنے کتے کو شکار کے لیے چھوڑتا ہوں اور میرے پاس اس کو ذبح کرنے کے لیے پتھر اور لاٹھی کے علاوہ کئی چیز نہیں ہوتی۔ تو جناب رسول اللہ (صلی اللہ علیہ وآلہ وسلم) نے فرمایا خون کو بہا دو خواہ جس چیز سے بھی ہو اور اللہ تعالیٰ کا نام لو۔ امام طحاوی (رح) فرماتے ہیں : کہ کچھ لوگوں نے اکھڑے ہوئے ناخن اور دانت اور نہ اکھڑے ہوئے ناخن اور دانت سے ذبح کو جائز قرار دیا اور اس دلیل کو پیش کیا۔ دوسروں نے کہا انھوں نے ان دونوں کے ذریعے ذبح کو مکروہ قرار دیا جبکہ یہ اکھڑے نہ گئے ہوں اور اکھڑے ہوئے ناخنوں اور دانتوں سے ذبیحہ کو جائز قرار دیا اور اس روایت کو دلیل میں پیش کیا۔
تخریج : مسند احمد ٤؍٢٥٨۔
اس بات پر تو سب کا اتفاق ہے کہ دانت و ناخن جو جسم کے ساتھ لگے ہوں ان کا ذبیحہ حرام ہے۔ البتہ امام شافعی (رح) کے ہاں جسم سے لگے ہوں یا اترے ہوئے بہر صورت ان کا ذبیحہ حرام ہے۔ امام ابوحنیفہ کے ہاں اترے ہوئے دانت اور ناخن سے ذبیحہ حلال ہے مگر توہین انسانیت کی وجہ سے مکروہ ہے۔
فریق اول کا مؤقف : بعض لوگوں نے دانت و ناخن کے ذبیحہ کو بہر حلال درست قرار دیا خواہ ناخن جسم سے متصل ہو یا الگ۔ دلیل کے لیے اس روایت کو پیش کیا ہے۔

٦١١٧: عبایہ بن رفاعہ نے اپنے دادا حضرت رافع بن خدیج سے نقل کیا کہ انھوں نے عرض کیا یارسول اللہ (صلی اللہ علیہ وآلہ وسلم) کل ہمارا دشمن سے سامنا ہے اور ہمارے پاس ذبح کے لیے چھری نہیں آپ نے فرمایا جس پر اللہ تعالیٰ کا نام لیا جائے اور وہ خون کو بہا دے ‘ اس ذبیحہ کو کھاؤ سوائے ناخن اور دانت کے اور میں تمہیں بتلاتا ہوں کہ ناخن کو چھری کے طور پر حبشہ والے استعمال کرتے ہیں اور دانت ہڈی ہے۔
تخریج : بخاری فی الشرکہ باب ٣‘ والجہاد باب ١٩١‘ مسلم فی الاضاحی روایت ٢٥‘ ابو داؤد فی الاضاحی باب ١٥‘ ترمذی فی الصید باب ١٨‘ نسائی فی الضحایا باب ١٩‘ ٢٠‘ ابن ماجہ فی الذبائح باب ٥‘ مسند احمد ٣؍٤٦٣‘ جلد ٤؍١٤٠۔

٦١١٨: حضرت عبایہ بن رفاعہ نے اپنے دادا رافع بن خدیج سے نقل کیا ہے کہ انھوں نے رسول اللہ (صلی اللہ علیہ وآلہ وسلم) سے گزارش کی کہ ہمیں امید یا خطرہ ہے کہ کل دشمن سے مڈھ بھیڑ ہو اور ہمارے پاس چھری نہیں کیا ہم بانس کے ساتھ ذبح کرسکتے ہیں جناب رسول اللہ (صلی اللہ علیہ وآلہ وسلم) نے فرمایا جو خون کو بہائے اور اس پر اللہ تعالیٰ کا نام لیا جائے اس کو کھاؤ سوائے ناخن اور دانت کے۔ اس روایت میں جن چیزوں سے ذبح ہوسکتا ہے ان میں سے ناخن اور دانت کو نکال دیا پس اس میں یہ بھی احتمال ہے کہ وہ اکھاڑے ہوئے ہوں اور یہ بھی احتمال ہے کہ وہ نہ اکھاڑے ہوئے ہوں اگر نہ اکھاڑے ہوئے ہوں اور پھر اکھاڑے ہوئے کا حکم کیا ہوگا اس کی کوئی دلیل یہاں موجود نہیں اور اگر وہ اکھاڑے ہوئے ہوں تو وہ دونوں جبکہ نہ اکھاڑے ہوئے ہوں زیادہ مناسب ہے کہ وہ اس طرح ہوں اور اگر اس سے مراد نہ اکھاڑے ہوئے ہوں اور پھر اکھاڑے ہوئے کے متعلق کیا حکم ہوگا اس کی کوئی دلیل نہیں اور نہ اکھاڑے ہوؤں کے متعلق جب پختہ طور نہی کا آنا ثابت ہوگیا اور اکھاڑے ہوئے کے متعلق معلوم نہ ہوا۔ حالانکہ حضرت عدی کی روایت میں یہ بات موجود ہے وہ مطلق ہے اور جن کے بارے میں ہمیں علم تھا ہم نے ان کو حدیث رافع کے ذریعے نکال دیا اور جن کے بارے میں علم نہیں تھا ان کو حدیث رافع کے ذریعے نکالنے والا معاملہ چھوڑ دیا جیسا کہ حدیث عدی (رض) میں مطلق آیا ہے اور حضرت عبداللہ بن عباس (رض) سے بھی یہ بات مروی ہے روایت یہ ہے۔

٦١١٩: ابو رجاء عطاردی کہتے ہیں کہ ہم حج کے لیے نکلے تو ساتھیوں میں سے ایک نے خرگوش شکار کیا اور اس کو اپنے ناخن کے ذریعے ذبح کیا اور اس کو بھونا سب نے کھایا مگر میں نے نہ کھایا جب ہم مدینہ منورہ پہنچے تو میں نے ابن عباس (رض) سے اس کے بارے میں سوال کیا تو انھوں نے فرمایا شاید تم نے بھی ان کے ساتھ کھایا ہوگا میں نے کہا نہیں تو انھوں نے فرمایا تم نے درست کیا۔ انھوں نے اس کا گلہ گھونٹ کر مارا ہے۔

٦١٢٠: یعقوب بن اسحق نے بیان کیا کہ ہمیں سلم بن زریر نے ابو رجاء سے اسی طرح روایت بیان کی ہے۔ کیا تم غور نہیں کرتے ہو کہ ابن عباس (رض) نے اپنی روایت میں وضاحت کردی کہ یہ طریق کار جس سے ناخن کے ذبیحہ کا کھانا حرام ہوا وہ گلہ دبانا ہے کیونکہ جو اس طریقے سے ذبح کیا جائے گا وہ ہتھیلی سے ذبح ہوگا نہ کہ اور کسی چیز سے اس لیے وہ گلہ گھونٹا ہوا شمار ہوگا پس اس سے یہ ثبوت مل گیا کہ جس ناخن سے ذبح کرنا ممنوع ہے وہ ناخن ہے جو ہتھیلی سے جڑا ہوا ہو وہ ناخن مراد نہیں جو کہ الگ ہو اس طرح جس دانت سے ذبح کرنا ممنوع ہے اس سے مراد وہ دانت ہے جو منہ میں گھڑا ہوا ہو کیونکہ یہ عضو کے اندر آئے گا۔ رہا الگ دانت تو اس کا ذبیحہ ممنوع نہیں یہی امام ابوحنیفہ ‘ ابو یوسف اور محمد رحمہم اللہ کا قول ہے۔